O 25 de Marzo, coincidindo co Día Internacional de Leer a Tolkien, https://www.sociedadtolkien.org/blog/2025/03/10/dia-internacional-de-leer-a-tolkien-2025/ e como parte da Semana Cultural do Instituto, os profesores Jesús Iglesias do Departamento de Inglés, e Alfredo Lata do Departamento de Filosofía, impartiron unha charla a cerca da estrutura narrativa chamada "A Viaxe do Heroe", tal e como a describe o famoso mitólogo Joseph Campbell. Dita conferencia é o eixe central do Clube de Lectura do Curso 2ºESO A, en correspondencia cos libros lidos "O Hobbit: Historia dunha ida e unha volta" de J.R.R. Tolkien e "Harry Potter e a Pedra Filosofal" de J.K. Rowling.
A conferencia comezou por asimilar dita estrutura ao camiño espiritual interior dos peregrinos a Santiago de Compostela, afondando na orixe da estrutura na vida mesma de cada persoa, e como dita estrutura se reflicte xa nas primeiras civilizacións, como por exemplo no Libro Exipcio dos Mortos e a súa supervivencia no tempo a través de diversos medios, tan peculiares como as cartas do Tarot.
Na conferencia proxectáronse dous vídeos curtos: un fragmento dunha entrevista ao propio Campbell sobre o mito moderno de "A Guerra das Galaxias" de George Lucas, e unha animación describindo as etapas do camiño do heroe e a súa aplicabilidade á vida cotiá de cada persoa.
A continuación estudamos por medio de diapositivas as diferentes etapas da viaxe do heroe mediante imaxes das adaptacións cinematográficas e ilustracións de tres exemplos paradigmáticos: "O Hobbit", "Harry Potter" e "A Guerra das Galaxias". Ditas diapositivas foron comentadas polos profesores afondando nos aspectos filosóficos, literarios e éticos dos mesmos, e con achega dos alumnado, especialmente dos membros do Clube de Lectura.