SEMANA CULTURAL, VENRES

   

Pechamos a XXV edición da nosa Semana Cultural con dúas interesantísimas charlas sobre bioenerxética e medicina xenómica a cargo de  Miguel Santiago Alonso e Ángel María Carracedo. 

SEMANA CULTURAL, XOVES

Comezamos xornada coa proxección da longametraxe  A lingua das bolboretas de José Luís Cuerda. A continuación teremos un obradoiro de xornalismo a cargo de Olalla Liñares e unha charla sobre a inclusión educativa e social impartida por Lucía Casal de la Fuente.

SEMANA CULTURAL, MÉRCORES

    

Proseguimos coa XXV edición da Semana Cultural. Entre a oferta de hoxe figura a posibilidade de coñecer interesantes datos sobre  Nova Zelanda, a descuberta  da relación entre o soul e a literatura e a participación nos obradoiros de educación sexual, papiroflexia e publicidade.

SEMANA CULTURAL, MARTES

Hoxe celebramos a segunda xornada da nosa Semana Cultural. Velaquí a proposta de actividades nas que poderemos participar ao longo do día.

SEMANA CULTURAL, LUNS

      Iniciamos a XXV edición da Semana Cultural do IES de Curtis con dous obradoiros de olería e cestería. Na sesión da tarde contaremos coa presenza de Marisa del Río que compartirá os seus coñecementos   sobre  publicidade co alumnado e o profesorado integrante do equipo de biblioteca.

ENCONTRO CON MARISOL ORTIZ DE ZÁRATE

    Nesta segunda semana que xa remata tivemos a sorte de poder abrirlle as portas da nosa biblioteca á novelista vasca Marisol Ortiz de Zárate, quen nos contou como entrou no mundo da literatura, como se fixo escritora e de onde arrincan  os motivos que inspiran algunhas das súas narracións. 

      O  alumnado de 1º de ESO e os membros do club de lectura de 2º de ESO, todos eles coñecedores de obras súas (Las lágrimas de la matrioska, La canción de Shao Li, Rebelión en Verne, Cantan los gallos...), escoitaron de primeira man como esta autora se namorou pouco a pouco da literatura ata atreverse a crear ele mesma as súas ficcións. Incidiu en que antes de ser escritora foi unha gran lectora: este gusto pola lectura naceu ó carón da apertura dunha biblioteca preto da súa casa. Esta ansia por  ler levouna a coñecer máis e máis historias, que, sen dúbida, están moitas veces, detrás da súa faceta creadora (pensemos na novela Rebelión en Verne, onde fai un recorrido polas obras do autor francés). 

     Respondeu a numerosas preguntas dos rapaces sobre as obras que tiveron oportunidade de ler neste trimestre. Soubemos que o seu gusto por presentar parellas de irmáns como protagonistas das súas obras nace dos fortes lazos fraternais na súa familia: son oito irmáns cunha moi boa relación.  Tamén o tema do irmán que se perde ten unha orixe autobiográfica: cando era pequena os pais levávanos moitas veces de viaxe para coñecer distintos lugares de España e, como eran tantos, ela tiña medo de que se perdera algún dos rapaces; ese temor infantil é a causa de que algún dos protagonistas desapareza momentaneamente. 

     Como viaxa con certa frecuencia, esas viaxes e o que observa nelas sérvenlle a miúdo como fonte de inspiración: agora entendemos por que La Canción de Shao Li está ambientada en Londres e Las  lágrimas de la matrioska en Kiev... 

      Esta "contadora de historias" -é como ela se define- e gran lectora da inmensa obra de J. Verne recomendou ao seu público xuvenil a obra Hoyos, de Louis Sachar, escritor no que se inspira con frecuencia á hora de crear novas ficcións. 

     Desde aquí dámoslle as grazas por compartir con nós as claves do seu oficio e dos seus atractivos  mundos de ficción. 

QUEN É ESA MULLER? (VENRES, 9 DE MARZO)

E hoxe chegamos xa ao remate do concurso, so queda adiviñar a identidade destas catro mulleres.  Xa vedes que pasou moi, moi rápido. ¡ Moita, moita sorte e grazas pola vosa participación !

QUEN É ESA MULLER? (MÉRCORES, 7 DE MARZO)

Xa estamos no terceiro día de concurso e vemos que sodes uns bos investigadores. Aquí vos deixamos un novo reto. Esperamos que o resolvades con éxito!

QUEN É ESA MULLER? (MARTES, 6 DE MARZO)

     
     Aquí vos deixamos as pistas de hoxe. Veña, equipos, veredes como o conseguides!
Non esquezades entregar na biblioteca, ao longo do día de hoxe, as respostas de onte; recollede, cando as deixedes, as novas tarxetas.

QUEN É ESA MULLER ( LUNS, 5 DE MARZO)

     Aquí vos deixamos as pistas e as imaxes que vos axudarán a descifrar a identidade das catro mulleres propostas para o día de hoxe. Cando teñades a solución, escribídea nas tarxetas. Moita sorte e a conseguir o maior número de acertos posible!

RECITANDO A ROSALÍA

       

     No IES de Curtis queremos contribuír á homenaxe colectiva rendida a Rosalía de Castro co motivo do aniversario do seu nacemento (Día de Rosalía). Compartimos estas creacións do alumnado en formato de vídeo a xeito de  mostra representativa da nosa resposta á convocatoria espallada polas redes de recitado de poemas rosalianos. 

      Marcos Bermejo de 3º ESO A e Leonardo Ríos  de 4º ESO B poñen voz a dous dos seus poemas: "Pasa río, pasa río" de Cantares gallegos e "Soia" de Follas Novas.

.

 

CALENDARIO