AS MIRADAS DE ISAAC

 

O pasado 24 de febreiro tivemos a oportunidade de asistir por medio dunha visita guiada virtual á exposición As miradas de Isaac. Conectamos por vídeo conferencia coa Cidade da Cultura para achegarnos un chisco á figura do empresario e artista Isaac Díaz Pardo. A actividade estaba organizada conxuntamente polos Departamentos de Historia e Lingua Galega. De xeito previo vimos un documental sobre a historia de Sargadelos e unha presentación sobre a  vida e a obra do intelectual.

Recollemos algúns dos comentarios  do alumnado de 4º ESO sobre a excursión virtual:

O que máis me gustou foi coñecer a vida de Isaac Díaz Pardo e a da súa familia e tamén a historia de Sargadelos. Impresionoume  moito o proceso de elaboración da cerámica.

                                                                                                                                   Alba Tizón 

A conferencia tratou do pintor, ceramista, deseñador, editor  e empresario Isaac Díaz Pardo. O guía falouno da súa vida, dende como o marcou a morte de seu pai (que foi fusilado) ata como consegue xunto con Luís Seoane dar nova vida ás pezas de Sargadelos.  

                                                                                                                            Lorena Losada

A visita á exposición sobre Isaac Díaz Pardo foi entretida, a súa traxectoria artística, a vida que tivo que levar por non apoiar a ditadura franquista, os seus deseños en Sargadelos… pero sobre todo interesoume  moito a parte da charla na que nos ensinaron vídeos del falando sobre o que lle pasara ao longo da vida, as súas crenzas e a maneira de ver o mundo.

Anxela Roca 

A visita foi moi interesante.  As partes que máis me gustaron foron  o taller de alfarería de Sargadelos e ver como como nas obras de  Díaz Pardo había críticas moi sutís contra a ditadura.

                                                                                                                                Alan Seoane

A súa vida non foi moi doada xa que tivo que pasar algunhas experiencias traumáticas pero aínda así, dedicouse  ao que máis lle gustaba.

Importante a destacar da exposición son as súas pinturas, que expresan moitos sentimentos, pero sobre todo o graffiti que pintou na Praza do Obradoiro en 1936, no que defendía o Estatuto de Autonomía.

Ariadna Fernández

Foi unha charla moi interesante, o que máis me impresionou foi a vida tan dura de  Isaac Díaz Pardo e, sobre todo, como se  amañou para  saír adiante,  superar  as dificultades e "estar vivo". 

Jesús Ferreiro

O que máis me sorprendeu foi o que dixo nas súas últimas entrevistas falando sobre as redes sociais e o lixo, que nun futuro serían un problema para o mundo.  Tamén me chamou a atención o punto irónico que tivo na entrevista cando lle preguntaron: Como se encontra? e el respondeu "vivo, encóntrome vivo"

 Dalvin Familia

                                                 

                                                                  

Isaac Díaz Pardo é unha persoa moi importante para a cultura galega xa que a defendeu de moitas maneiras. Foi un notable ceramista, pintor e intelectual galego entre outros oficios. Tamén é importante remarcar o seu  labor na recuperación da cerámica de Sargadelos porque é parte da cultura galega.

O que máis me sorprendeu da súa vida foi que tivo que pasar 6 meses encerrado para non ser asasinado como seu pai pola súa ideoloxía; debeu de ser moi duro para el.

                                                                                                                           Sofía Vigo Ares

 A súa vida non foi fácil xa que “pasearon· ao seu pai durante o franquismo pola súa ideoloxía, razón pola que Isaac se ten que esconder na Coruña durante meses.

Resucitou a fábrica de Sargadelos, creou a editorial Edicións do Castro para reconstruír a memoria histórica de Galicia.

                                                                                                                         Manuel Vázquez

A charla sobre Isaac Díaz Pardo achegounos á figura deste artista tan polifacético e importante para a a cultura galega e para a súa recuperación durante o franquismo.

O que máis me gustou, foron, sen dúbida, os fragmentos que nos puxeron do propio Isaac falando, xa que foi unha persoa moi lonxeva e da que se conservan moitos documentos de vídeo.  A pesar de que na visita non se afondou demasiado na faceta artística, chamoume moito a atención o feito de que moitos deseños de Sargadelos se sacaran de lugares emblemáticos de Galicia como, por exemplo, da igrexa de Monfero.

Nuno Couso  

 Se tivera que destacar un aspecto sería sen dúbida a humildade e a característica personalidade de Isaac. En concreto, agradoume como el ía camiñando pola fábrica de Sargadelos e o feito de que deixara apuntamentos a cada empregado para ter en conta para o seguinte labor. Por outra parte, apreciei a maneira na que lembraba tempos pasados cun ton emotivo.

María Conde

Esta exposición gustoume, porque ademais de coñecer datos curiosos sobre Isaac, puidemos apreciar algúns dos seus cadros, carteis sobre o Estatuto de Autonomía firmados por el... A todo isto pódolle engadir que me fixo ilusión, xa que como ben dixen antes, Isaac foi un home moi importante para Galicia por moitos aspectos a destacar, pero un dos máis salientables foi a renovación de Sargadelos, fábrica de louza moi representativa de Galicia e, polo tanto, de todos os galegos. 

Sara González