Manuel María na lembranza

Día das Letras Galegas

O Día das Letras Galegas é un día de exaltación da lingua de Galicia a través da súa manifestación literaria. Comezou a celebrarse o 17 de maio do 1963, coincidindo co centenario da primeira edición de Cantares gallegos de Rosalía de Castro. Aínda que a data exacta de publicación do libro se descoñece, foi  ese día cando Rosalía asinou a dedicatoria da súa obra á escritora Fernán Caballero. 

En 1963, tres membros da Real Academia Galega (Manuel Gómez Román, Xesús Ferro Couselo e Francisco Fernández del Riego) presentaron nesta institución a proposta de celebrar o 17 de maio para recoller o "latexo material da actividade intelectual galega". Podemos afirmar,  case con seguridade, que Rosalía de Castro nunca puido imaxinar a importancia que a súa obra ía ter na historia da nosa literatura nin que esa data sería lembrada ano tras ano para simbolizar o recoñecemento e a necesaria valoración dunha cultura, dunha lingua e dun pobo. A institucionalización da celebración do Día das Letras Galegas abriu a porta ao coñecemento e ao recoñecemento de figuras da nosa literatura.

Este ano o escritor homenaxeado é o chairego Manuel María.  No día grande da nosa cultura recollemos un fermoso legado onde o poeta reflexiona sobre o poder e a transcendencia da poesía. 

Feliz Día das Letras a todos e a todas!

                 O poema

Un poema é un ser vivo que anda,
respira, soña, chora, salouca,
ama, berra, cintila, escurece,
cala, aborrece a mentira,
sente odio e tenrura, desángrase,
fala de intimidade a intimidade
coas cousas e coa xente, suxire
mundos posíbeis e imposíbeis,
sua, cansa, sofre sede e fame,
adoece, agoniza.
E nunca morre.



                A luz resucitada (1984)

Visita á Casa Museo de Manuel María e ao Museo Provincial de Lugo

 

O pasado 18 de abril a rapazada de 1º ESO foi de excursión a Lugo. Velaquí a crónica da viaxe e a reportaxe fotográfica.

Na primeira parte da mañá visitamos a Casa Museo de Manuel María, chamada Casa de Hortas. Alí, un guía falounos de distintos aspectos da vida e da obra deste autor ao que este ano se lle dedica o Día das Letras. Ademais fixemos unha visita guiada pola casa na que naceu o poeta e que foi recentemente restaurada. Alí chamounos a atención que había poemas impresos polas paredes e nas contras dunha ventá. Tamén visitamos o cemiterio onde está enterrado o escritor e alí recitáronse poemas. Asemade, a outra metade do grupo fixo unha pequena ruta ata a beira do río.

Na segunda parte da mañá desprazámonos ata a cidade de Lugo para ver o Museo Provincial. Alí fixemos unha actividade relacionada cun libro que estivemos lendo e comentando nas clases de Lingua: Contos do Museo. Son catro relatos de temática misteriosa que se desenvolven en maior ou menor medida no citado museo. Algúns dos seus autores son tan coñecidos como Agustín Fernández Paz ou Xabier Docampo. A actividade consistiu en responder unha serie de cuestións relacionadas cos contos ou con obxectos do propio museo. Dividíronnos en catro grupos e a cada un asignáronnos un conto. A partir deste momento buscamos por todo o museo as respostas e cando rematamos reunímonos para facer a posta en común e o reconto das acertadas. Foi unha actividade moi entretida. Mágoa que xa era hora de volver á casa e non nos deu tempo a ver con máis detemento o museo!

Visita á Casa Museo de Manuel María e ao Museo Provincial de Lugo on PhotoPeach

Manuel María

O noso amor é mencer, tamén solpor

e negrura da noite, luz do día,

luceiro escentilante que nos guía

a un universo senlleiro e tentador.

Non é soidade o amor, melancolía,

brillante, sobrehumano resplandor:

é berro fondo, calado, aterrador

que, urxentemente, esixe compañia¡

O verdadeiro amor sempre é mencer,

claridade que nace porque si

na imprecisión total do noso ser.

Non teño outro dexeso, máis querer,

que vivir, miña amiga, perto de ti

e, ao teu lado, soñar e envellecer.